Žarko Paić

ʺKaj je to jezik nek luda špelancija življenja kak igre. Najbolši enciklopedijski latinsko-horvatski rečnik svih cajta, a to je mislil i argentinski meštar-bibliotekar i pismoznanec J. L. Borges 2.0. kad je nafčil kajkavski za slepce prek međužnore-online, je ziher onaj Ivana Belostenca, Gazophylacium seu Latino-Illyrocorum onomatum aerarium. Objavil ga je v Agramu 1740. leta pavlin Jeronim Orlović. Usput i besput, pavlin Belostenec je v Gospodinu hrml još 1675. leta. Imel sem v rukama pretisek te genijalne knjige.

          Kupil sam je v antikvarijatu za fest velike nofce. Al da me vubiješ z duplim širajlzom, kak je onaj ludi Ludwig iz Cambridgea morti nakanil kresnuti sir Karla Poppera nakon jedne mudroslovne disputacije direkcijon vu čelenku, nemrem je najti na tavanu ni na mansardi. Kak da je v črnu zemlu propala. Zato se moram osloniti na vlastiti propuh v glavi da bi ispeljal ovo kaj bum ve rekel. Če je afrički krokodil z Nila, kak veli pavlin Belostenec v toj Knjigi, velka kača z ljuskami prek tela i debelih nogu, onda je praf zapraf Gazophylacium domači frkani barok za potrebe školskoga Aufklärunga na kajkaviani od Varaždina do Preloga i podrafskih halasa z Drave. Pojmovi i reči su napisane tak kićeno i obuhvatno da se zgubiš v šumi značenja i prije nek si ušel i zišel znutri-vun. Da je pavlin z Lepoglave znal tak lepo pisati i od nilske kače s ljuskami beloga slona narisati s velkim vuhima i još većim pamćenjem nek u prebendara Kloštra podravskoga, to je zasluga općeg stila epohe krasopisanja, učtivog govorenja i zvukopisa baroknih mudrijaša i muzikanata tipa Leibniza i Bacha.

      Vsi sme mi, grabancijaši i puntari, medikuši i zlatari, tati i histrioni, žmukleri i kramari, potepuhi i maleri, vagabundi i biškupi same deca svoga cajta jer drugač bi bile gerade za ponoriti. Nigdar ne bi znal muž gda se napije kak turopoljski prasec v koju luknju od ukronije mora iti, a verna žena ne bi znala z kim u perinama  ima posla i u kojoj to zemli vutopije morti ne ureduje filijala španjolske inkvizicije. Barok je bil savršena epoha za pavline, serafine i gubec pod galgami skratiti. Vse drugo je lepi red, španciranje uz vrbe i mathesis universalis. Kaj je, ak se praf zeme, enciklopedijski barokni Gazophylacium ak ne ausvajs za humanitas vu ovoj zemli nepismenih i neobrazovanih trumbetaša i kmetije gde je biti gospon fiškal vrhunaravni doseg vekivečne horvatske pameti?

       Ono najvelevažno je, pak, to da je Belostenec kakti grčki demijurg iz rasute zemle i blata naredil, uredil i zapečatil kajkavski jezik koji v toj Knjigi v zlatotisku lepše zvuči od galskoga, iberskoga, teutonskoga skup i zajedno. Nije bez veze onaj slepec iz Buenos Airesa progruntal v glavi kaj je pavlin z Lepoglave ostavil svome rodu i porodu od črnoga mraka, ter je i posle svoje smrti nakanil međužnorno-online nafčiti sintaksu, semantiku i pragmatiku jezika kojim se dvori neke druge večnosti otpiraju nunc stans čim veliš KAJ. Jezik je, dragi moji kaotični razmetljivci i poldrugači, ONO bez čega mišljenje nemre ništ. A glasi i zvuci tog jezika u Gazophylaciumu lepši su i zpametnejši i od Gilgameša i od Talmuda i od Fausta skup i zajedno.

      Jezik je črna luknja bitka. Vse kaj još ostaje od nas suvišnih mudrijaša i maleficijaša nalazi se v njemu. Amen i also sprach Ich, Ivan Belostenec 2.0. pavlinski z Lepoglave, A.D. MMXXIII, na Velku mešu. Još paraf i za praf je sega više dost.ʺ